ಬರೆವ ಪದಗಳೆಲ್ಲ ಓದಬೇಕೇನೋ?

ಬದುಕ ಪದಗಳೇ ಸಾಕಲ್ಲವೇ..?

ಮತ್ತೇಕೆ ಹುಡುಕಿ ತೆಗೆಯುವೆ ಚೆಲುವೆ

ಬರೆಯದ ಪದಗಳು ಕವಿತೆಗಳಲ್ಲವೇ

ನಿನ್ನಲ್ಲಿ ಅವುಗಳು ಅವಿತ್ತಿಲ್ಲವೇ..?

ನಿದ್ರೆಯ ಬಿಡದಿರು ನೀರೆ

ಹೊಳೆಯುವ ರಾಶಿ ತಾರೆ..

ಭದ್ರವಾಗಿರುವ ಕನಸುಗಳು

ನಿನ್ನ ನಂಬಿರುವ ಮನಸ್ಸುಗಳು 

ಕಾದಿವೆ ನೋಡು ಬಾನೆತ್ತರದಲಿ

ಜಾರಿ ಬೀಳದಿರಲಿ ಮಳೆ ಹನಿಯಲಿ..

ಕಟ್ಟುತಿರುವುದು ಗೆದ್ದಲು 

ಬೇರುಗಂಟಿಯ ಸುತ್ತಲು

ಮಣ್ಣ ರಾಶಿಯಗೂಡುತಾ

ನೆರಳಾಗುವುದೆಂದು

ಹುತ್ತವನು

ಬಂದು ಸೇರುತಿವೆ

ವಿಷದ ಹಾವುಗಳು

ಕೆಡವಲಾಗುತಿದೆ

ಕಟ್ಟಿದಾ ನಂಬಿಕೆಯ

ಎತ್ತರವನು

ಜೀವ ಸವೆಸಿದ

ದಣಿದ ದೇಹಗಳು

ನೂರು ಚಿಂತನೆ

ಏಕ ತತ್ವವು

ಮಣ್ಣಾಗುತಿವೆ

ಮೇಲೆ ನೋಡುತಾ

ಕೆಳಗೆ ಭಯದಲಿ

ಅಡಗಿ ಕುಳಿತ

ಆಸೆಗಳೆಲ್ಲವು

ಹಣ್ಣಾಗುತಿವೆ

ಯಾರು ಬಂದರೇನಂತೆ

ನಗುತಿವೆ ಮೋಡಗಳು

ಮುಳುಗುತಿವೆ ಬದುಕು

ಮತ್ತೆ ನೆನಪಾಗುತ್ತಿದೆ

ಆ ಸಾಲು 

ನೀನಾರಿಗಾದೆಯೋ ಎಲೆ ಮಾನವ!

ನೀ ಕಳುಹಿದ ಪತ್ರಕ್ಕೆ 

ಬರೆಯದ ಉತ್ತರ

ಮನದಲ್ಲೇಕೊ ಜಿನುಗುತಿದೆ

ಭಾಷೆಯ ಭಾವ

ನಿರಾಸೆಯಾಗದೆ

ಉಳಿಯಲಿ ನಿನ್ನ ಹೃದಯದಲಿ

ಹರಿಯುವ ಮಳೆಯಲಿ

ಕಾಗದ ದೋಣಿಯಲಿ

ನಾ ಬರೆದ ಸಾಲುಗಳೆಲ್ಲ ಪ್ರೀತಿಗಿದೆ

ತೇಲಿದೆ ನೋಡು 

ತೆರೆಯದೆ ಕಾಣು 

ಆ ಒಲವಿನ ನಿಜ ಆನಂದವನು

ಚೆಲುವಿಗೆ ಹೆಸರು 

ಜೀವಕ್ಕೆ ಉಸಿರು

ಪದೇ ಪದೇ ನನ್ನ ಕರೆಯದಿರು

ಸಂಗಡ ದಾರಿಯ

ಮರೆತ ಸಂಚಾರಿಯ

ದೂರದಿ ನೋಡಿ ನಗುತಿರು..

ಬೆರಳ ಬಿಗಿದಿರಲು ಸಲುಗೆ

ಮೌನದೊಳಗಿನ ಪಯಣ

ಮುಗುಳುನಗೆಯ ನೋಟ

ಜತೆ ಹೆಜ್ಜೆಯೊಳಗಿದೆ ನಿನ್ನೊಲುಮೆ..

ಚೆಲುವೆ

ನಿನ್ನ ಮುಂಗುರುಳ ಬಂಧನದಲಿ

ಆ ರವಿ ನಾಚುತ ಮುಳುಗಿದನು 

ಸಾಗರದಲೆಗಳ ಒಲವ ಸಂಗೀತಕ್ಕೆ 

ನೀನಾದೆ ಮರಳ ಹಾದಿಯ ಕವಿತೆ..

ತಂಪಿರುಳ ನಗೆಯಲ್ಲಿ

ಮುಂಗುರುಳು ಬೆರಳುಗಳ

ಆ ಚಂದ್ರ ನಿನ್ನಾಟವನು

ಬೆಳದಿಂಗಳ ಬೆಳಕಲಿ

ಸೆರೆಹಿಡಿದ ನೋಡೆ ಸಂಗಾತಿಯೆ..

ಅರ್ಥಮಾಡಿಕೊಳ್ಳಲಿಲ್ಲವೆಂದು

ನೀ ಅಳುವುದೇಕೆ ಚೆಲುವ ತಾರೆ

ನಾ ಚಂದ್ರತಾರೆಯಲ್ಲ

ಬಾನಾಚೆಯಿಂದ ಇಳಿಯಲಾರೆ..

ನಾ ಭುವಿಯೊಡಲ ಆವಿಯು

ಮೋಡದೊಡನೆ ಬರುವೆನು

ನಿನ್ನ ನೋವ ತೊಳೆಯಲು

ಮಳೆಯಾಗಿ ಸುರಿವೆನು..

ಕನಸು ಕಾಣಲು ಚೆಂದವಂತೆ

ಒಪ್ಪಿ ಮನಸ್ಸು ನೀಡಲು

ನಲಿವುನೋವು ಹರಟೆ ಬೇಕು

ಪ್ರೀತಿ ಬದುಕ ತೀಡಲು..

ನೀ ನಗಲು ಜೀವದೊಲವೆ

ಹಗುರವಾಯಿತು ಎನ್ನೆದೆ

ಬೆಳಗುತಿಹ ದೀಪವಾದರೆ ನೀ

ಎಣ್ಣೆ ಬತ್ತಿಯ ತನುವು ನನ್ನದೆ..