ನೀ ಕಳುಹಿದ ಪತ್ರಕ್ಕೆ 

ಬರೆಯದ ಉತ್ತರ

ಮನದಲ್ಲೇಕೊ ಜಿನುಗುತಿದೆ

ಭಾಷೆಯ ಭಾವ

ನಿರಾಸೆಯಾಗದೆ

ಉಳಿಯಲಿ ನಿನ್ನ ಹೃದಯದಲಿ

ಹರಿಯುವ ಮಳೆಯಲಿ

ಕಾಗದ ದೋಣಿಯಲಿ

ನಾ ಬರೆದ ಸಾಲುಗಳೆಲ್ಲ ಪ್ರೀತಿಗಿದೆ

ತೇಲಿದೆ ನೋಡು 

ತೆರೆಯದೆ ಕಾಣು 

ಆ ಒಲವಿನ ನಿಜ ಆನಂದವನು

ಚೆಲುವಿಗೆ ಹೆಸರು 

ಜೀವಕ್ಕೆ ಉಸಿರು

ಪದೇ ಪದೇ ನನ್ನ ಕರೆಯದಿರು

ಸಂಗಡ ದಾರಿಯ

ಮರೆತ ಸಂಚಾರಿಯ

ದೂರದಿ ನೋಡಿ ನಗುತಿರು..

ಬೆರಳ ಬಿಗಿದಿರಲು ಸಲುಗೆ

ಮೌನದೊಳಗಿನ ಪಯಣ

ಮುಗುಳುನಗೆಯ ನೋಟ

ಜತೆ ಹೆಜ್ಜೆಯೊಳಗಿದೆ ನಿನ್ನೊಲುಮೆ..

ಚೆಲುವೆ

ನಿನ್ನ ಮುಂಗುರುಳ ಬಂಧನದಲಿ

ಆ ರವಿ ನಾಚುತ ಮುಳುಗಿದನು 

ಸಾಗರದಲೆಗಳ ಒಲವ ಸಂಗೀತಕ್ಕೆ 

ನೀನಾದೆ ಮರಳ ಹಾದಿಯ ಕವಿತೆ..

ತಂಪಿರುಳ ನಗೆಯಲ್ಲಿ

ಮುಂಗುರುಳು ಬೆರಳುಗಳ

ಆ ಚಂದ್ರ ನಿನ್ನಾಟವನು

ಬೆಳದಿಂಗಳ ಬೆಳಕಲಿ

ಸೆರೆಹಿಡಿದ ನೋಡೆ ಸಂಗಾತಿಯೆ..

ಅರ್ಥಮಾಡಿಕೊಳ್ಳಲಿಲ್ಲವೆಂದು

ನೀ ಅಳುವುದೇಕೆ ಚೆಲುವ ತಾರೆ

ನಾ ಚಂದ್ರತಾರೆಯಲ್ಲ

ಬಾನಾಚೆಯಿಂದ ಇಳಿಯಲಾರೆ..

ನಾ ಭುವಿಯೊಡಲ ಆವಿಯು

ಮೋಡದೊಡನೆ ಬರುವೆನು

ನಿನ್ನ ನೋವ ತೊಳೆಯಲು

ಮಳೆಯಾಗಿ ಸುರಿವೆನು..

ಕನಸು ಕಾಣಲು ಚೆಂದವಂತೆ

ಒಪ್ಪಿ ಮನಸ್ಸು ನೀಡಲು

ನಲಿವುನೋವು ಹರಟೆ ಬೇಕು

ಪ್ರೀತಿ ಬದುಕ ತೀಡಲು..

ನೀ ನಗಲು ಜೀವದೊಲವೆ

ಹಗುರವಾಯಿತು ಎನ್ನೆದೆ

ಬೆಳಗುತಿಹ ದೀಪವಾದರೆ ನೀ

ಎಣ್ಣೆ ಬತ್ತಿಯ ತನುವು ನನ್ನದೆ..

ಸಿಂಗರಿಸಿದ ರಥವೇರಿ

ನಗುಬೀರಿದೆ

ಚೆಲುವು ಕಣ್ತುಂಬಿದೆ

ಸಾವಿರದ ನಡುಗಡಲ

ತೆರೆಯಲ್ಲಿ

ಮುಳುಗೇಳುವ ಭಾವ

ನನ್ನ ಕಾಡಿತು

ನಿನ್ನ ನೋಡದೆ

ಬೆನ್ನ ಹಾಕಿರುವ ಹುಡುಗಿಯೆ

ನಿನ್ನ ಪಾದವ ಕಡಲು ತಾಕಿ

ಕಾಲು ಹುದುಗವ ಮುನ್ನ

ಸೂರ್ಯ ನಾಚಿದನು ನೋಡು

ತಿರುಗಿ ನೋಡೆಯ ಒಮ್ಮೆ

ಕೈಯ ಚಾಚುತ ನಡೆದು ಬಾ

ತಡಿಯ ಮರಳ ರಾಶಿಯಲಿ 

ಮನೆಯ ಮಾಡಿರುವೆ ನಿನಗೆ

ನೀಲಾಕಾಶವನು ತಿವಿದು

ಭೋರ್ಗರೆವ ಸಿಡಿಲು

ಧರೆಗಿಳಿದಿದೆ

ಇಳೆ ನಡುವ ಸೀಳಿ

ಹಸಿಮರವು ಬಾಡಿ

ಧರೆಗುರುಳಿದೆ

ಕರ್ಣವನು ಬಡಿದು

ತಲೆಭಾರದ ಮಾತುಗಳು

ನೆಮ್ಮದಿಯ ಕೆಡಿಸುತಿವೆ

ನಿನ್ನೊಲವಿನ ಸುಖಕ್ಕಾಗಿ

ಎದೆಗೊರಗಿ ಅಳುತಿವೆ

ನೋಡು ನಮ್ಮಿಬ್ಬರ ಕನಸು

ಯಾರ ನೋವಿನ ಶಾಪ

ಮನವು ಕದಡಿದ ಪಾಪ

ತಿಳಿಯದೇ ಈ ಸಿಡುಕು 

ಮಳೆ ಸುರಿದು ಬೆವರಳಿದು

ಹೊಸಜೀವ ಪುಟಿದೆದ್ದು

ಹಸಿರಾಗದೇ ಈ ಬದುಕು

ಯಮುನೆ ಹರಿವು

ಜುಳುಜುಳು ನಾದ

ಹಸಿರ ನೆಲದ ತಂಪು

ಚಾಚಿದ ಹೂವ ಕಂಪಿನಲಿ

ಯಾರೋ ನುಡಿದಂತೆ

ಮನದಲಿ ನಡೆದಂತೆ

ಹೇಳೆ ನೀ ರಾಧೆ ನಾ..

ಶ್ರವಣವು ಅಪ್ಪಿದ ನುಡಿ

ಕಚಗುಳಿಯ ಇಂಪು

ನಿನ್ನ ಧ್ವನಿಯು

ತರುವೆ ನಾ ಕೊಳಲನು

ಮರವನೇರಿ ನಿನ್ನ ಸನಿಹ

ಸಾನಿಕ ನುಡಿಸುವೆ

ಹೇಳೆ ನೀ ರಾಧೆ ನಾ..

ನವಿಲು ನಡಿಗೆಯ ದಾರಿ

ಗರಿಯು ಶಿರವನೇರಿ

ಕೇಶವಲಂಕರಿಸಿದೆ ನಿನಗಾಗಿ

ಕೊಡುವೆಯ ಸಮಯವ

ನಡುವೆಯ ಮೌನವ

ಎದೆಗೊರಗುತ ನನ್ನ

ಕಳೆದುಕೊಳ್ಳೋಣ ಪ್ರೀತಿಯಲಿ

ಮೂಗುತ್ತಿಯೊಂದು ಮುಂಜಾನೆಯಲಿ

ಬಾವಿಯ ರಾಟೆಯ ಹರಟೆಯಲಿ

ಮರಗಳ ಎಡೆಯಲಿ ತೂರಿದ ಬೆಳಕಲ್ಲಿ

ಹೊಳೆಯುತ್ತಿತ್ತು ರಾತ್ರಿಯ ಕಥೆಯ ಹೇಳುತಿತ್ತು

ಚದುರಿದ ಕೇಶವು ಗಾಳಿಗೆ ಬಾಗುತ್ತ

ಬೆರಳಲಿ ಮಡಿಯುತ

ಕಣ್ಣು ಒಂದೆಡೆ ಹಾಯುತ

ನಾಳೆಯ ದಿನಗಳ ಎಣಿಸುತಿತ್ತು

ಚೆಲುವ ಗುಣಿಸುತಿತ್ತು ನಾರಿ ನಾಚುತಿತ್ತು

ಊರಕೇರಿಯ ದೂರ ಅವಳ ಮನೆಯು

ಬದಿಯಲೆ ನಮ್ಮ ಗದ್ದೆಯ ಭತ್ತದ ತೆನೆಯು

ನಾನಕ್ಕರೆ ಅವಳಕ್ಕರೆ ಸೇರಿ ಮಾತು

ನಡುವೆ ಸುಯಿಗುಡುವ ಗಾಳಿಮಾತು

ತೊಳೆದ ನಾಚಿಕೆ ಬೆಸೆದ ಬಂಧವು

ಬೆಳೆದ ಸಂಚಿಕೆ ಮೊಗದ ಪ್ರೀತಿಯಂದವು

ಚೆಲುವ ಬದುಕಿಗೆ ತುಂಬಿದಾಕೆ

ಬಸಿರ ಹೊತ್ತ ಕೈ ಹಿಡಿದಾಕೆ

ಅವಳು ನನ್ನವಳು 

ನಗುವ ತಂದವಳು

ಹಳ್ಳಿ ಬದುಕಿನ ನೀರೆಯವಳು

ಬೆಳ್ಳಿ ಸಾಲಿನ ತಾರೆಯವಳು

ನಮ್ಮ ಪ್ರೀತಿಯ ಸಾಕ್ಷಿ ತವರು

ಹೊಟ್ಟೆಯಲ್ಲಿ ಚಂದ್ರಚಂದ್ರಿಕೆಯರು

ಕಾತರವ ನೀಡಿದೊಡತಿ

ಹೊಳೆವ ಕಂಗಳ ಗೆಳತಿ

ನಿನ್ನ ತೊರೆದ ಬದುಕು 

ಏಕೆ ಹೇಳ ಬಲ್ಲೆಯಾ..?

ಎನ್ನ ಹೃದಯದಿ ನೀನು

ಭಾವ ತುಂಬಿ ನಿಲ್ಲೆಯಾ..?

ಹರಿವ ಜಲದೊಳು

ಸವೆಯುತಿರುವೆನು

ಹಸಿರ ನೆಲದೊಳು

ಬೆಳೆಯುತಿರುವೆನು

ಹೆಸರು ಮಾತ್ರದಿ ಗೆಳೆತನ

ಮೂಡುತಿಹುದು ಸಿಹಿತನ

ಮೂಡಣ ಬೆಳಕಲ್ಲಿ

ಕಾಂತಿಯ ಚೆಲುವಿರಲು

ದೇಹದ ಜ್ವಾಲೆಯು

ಬೆಂಕಿಯ ಹಚ್ಚಿರಲು

ಸುಡುತಿವೆ ನನ್ನ ಏಕಾಂತ

ಸುರಿವೆಯ ನೀ ಮಳೆಯಂತೆ

ನೀನಿರದ ಗಳಿಗೆ

ಜ್ವರವು ನನ್ನಾವರಿಸಿದಂತೆ

ನೀನೆದುರಾದಾಗ

ನೀರೊಂದಿಗಿಳಿದ ಗುಳಿಗೆ

ಜೊತೆಗಿದ್ದರೆ ಸದಾ ನೀನು

ಖುಷಿಯಿಂದಿರುವೆ ನಾನು

ನಿನ್ನ ಭಾವದ ನೆರಳು

ಬೀಳುತಿದೆ ಎನ್ನ 

ಹೃದಯದ ಬಾಗಿಲಿಗೆ 

ಎನ್ನ ಮನದ ಮರುಳು

ಕೇಳುತಿದೆ ನಿನ್ನ 

ಬರಲಾರೆಯ ಒಳಗೆ

ಗೆಳತಿ ನನ್ನೆದೆಯೊಳಗೆ..

ಜೀವದಾರತಿಯನು ಉರಿಸಿ

ಕಾಡುವ ಕಷ್ಟಗಳನು

ಪ್ರೀತಿಯಿಂದಲೆ ಸರಿಸಿ

ಸ್ವೀಕರಿಸುವೆನು ಒಲವೆ

ಜೀವ ಬಂಧನಕೆ

ಬಾಗಿಸೆಯ ಕೊರಳನು

ಗೆಳತಿ ನವಜೀವನದೊಳಗೆ..

ಸಂಭ್ರಮವು ಬೇಕಿಲ್ಲ

ಮಂತ್ರಘೋಷಗಳು ಇಲ್ಲ

ಪ್ರೇಮದಾಲಾಪನೆಯೆ ನಮಗೆಲ್ಲ

ಒಪ್ಪಿಬಿಡುವೆಯ ಹೇಳು

ಕಟ್ಟಿಕೊಳ್ಳುವ ಕನಸನ್ನು

ನಮ್ಮಿಬ್ಬರ ಆರಮನೆಯಲ್ಲಿ 

ಗೆಳತಿ ಹೃದಯದ ಅರಮನೆಯೊಳಗೆ..

ಯಾವ ಜನಮಂದಿಯಿಲ್ಲವೊ

ವಾರಿಧಿ ತಟದೊಳು

ಅಲ್ಲೆ ನಿನ್ನೊಂದಿಗೆ ಕಳೆವೆನು

ನನ್ನ ಸಮಯವನು

ಸದ್ದುಗದ್ದಲವಿಲ್ಲದ ಕಾನನ

ಹರಿವ ಜಲರಾಶಿ ಪಕ್ಕ

ನಡುವೆ ಗುಡಿಸಲಿರೆ

ನಿನ್ನೊಂದಿಗೆ ಬದುಕ ಕಟ್ಟುವೆನು..

ಗೆಳತಿ

ಈ ಊರು ಪರವೂರು ಬೇಡ

ನಂಬಿ ಬದುಕುವ 

ನಮ್ಮಿಬ್ಬರ ಮನಸುಗಳಿರೆ

ಧರಿತ್ರಿಯ ಹಸಿರೊಳು

ಪ್ರೀತಿ ಹಂಚುತಾ ಬಾಳೋಣ..

ಓದು ಬಾ

ಓಡಿ ಬಾ

ಶಾಲೆಗೆ..

ಉತ್ತಿರ್ಣನಾಗಿ

ಭವಿಷ್ಯ ತಾ

ನಾಳೆಗೆ..

ಇಳಿಸಂಜೆಯ ಬಾನಲಿ

ತೇಳಾಡಿದೆ ಮನ

ಪಶ್ಚಿಮದ ಗಾಳಿಗೆ

ಮೈಯೊಡ್ಡುತಾ

ಅರುಣವರ್ಣವು ಚಾಚಿದೆ

ನೀಲಕಾಶವನು

ವರುಣನಿಲ್ಲದ ಮುದವು

ತನುವ ತುಂಬಿದೆ..

ಹಕ್ಕಿ ಗೂಡುಗಳ ಅರಸಿರಲು

ತನ್ನವರ ಸೇರಲು

ಧ್ವನಿಯಾಗಿದೆ ಸಂಧ್ಯರಾಗ

ಭಾವ ಮೀಟಲು

ಇಂಪಾಗಿದೆ ತಂಪಾಗಿದೆ

ಮರೆಯಲಾರೆನು

ಈ ಸಂಜೆಯನು

ಸಂಗಾತಿ ಜತೆ ಹೆಜ್ಜೆಯನು..